ahcene mariche le poète

TAZWART

  Ay ixef-iw rfed asefru...

Idhaq wul ad yessefru maca i wumi asefru ma ur d-igellu ara s ubeddel deg umadhal? I wumi asefru i deg ur tella tifrat?

Asefru ur d n-gellu ara s kra d amaynut, asenfel n tikta, s useftutes n tillas, s uslali n tafat, i wumi-t? D tidet asefru d ihulfan n wemdan id-yettfeggidhen deg-s, d kra id- yekkan si tkatarsist". Maca akin i ta, d acu yellal? D acu ara yawi imeghri d amaynut, d taghawsa s wayes i ara iqabel ddunit, d takti i ara yeffuktin d tid yesaa.

Wa d yiwen seg iaawwiqqen d yezgan deg webrid n kra n imedyazen. Maca llan wid i wumi ur yelli d aawwiq imi xeddmen akken ixeddem umeksa. I nagh tecfam fell-as tmacahut-nni n wasmi i as-nnan" a t-an ass-a d ageffur amek ara teksedh? Ihi, nwan sheslen-t ad asen-yini ur kessegh ara, netta, tugh yeghra-tent akken ghran ttelba ddemyati, yenna-as: "akken yella wass ad t-yeks umeksa!" anamek n wawal d wa: akken tebghu tili terwist, nekk ad s-ddugh, ur berrugh ara i yifassen-iw.

 Ayen akka? Acku amedyaz macci d win iberrun i yifassen, i tikta, i leqrar. D win yetteddun gher zdat, yessaram acku d asirem i t- –icudden gher tudert akken icudd taqbaylit-nni i as-yennan deg wawal-is" asirem yezdegh ul-iw ghas ddunit berriket".

Ihi, Hsen Maric d yiwen seg imedyazen-nni yugin ad brun i leqrar, seg wid yezdegh usirem. Asmi d-yessufegh ammud isefra amezwaru"Idh YUKIN"( Isefra steqbaylit d tsuqqilt gher t fransist) deg useggas n 2005, yezra belli yekcem-d annar iwaaren. Maca d acu i d anamek n tmeddurt n win ara yagaden igheblan n ddunit? Hsen ur ten-yugad: yezra acu d-djdjan imezwura, wid i yeggan llsas  i tmedyazt taqbaylit, wid i yas-yerran ccan. Yeghra ayen akk id-yeffghen di tezmamin n yisefra yuran s teqbaylit d kra id

yewwi Sliman Aazem, Lewnis Ayt Mengellat, Ben Muhemmed...

Hsen ur s hwin ara isefra n tayri yuran swanam n lwerd; netta, yesmenyaf ad yefk i yimeghriyen tameqqunt n lwerd i deg ara d-yeddu ujedjig ucbih yettrahen zid d isennanen iteqqsen, d-ijerrhen taksumt. Deg waya yemgarrad d Baudelaire d yewwin kra " ijedjigen n wayen n diri"

 Asseggas mbaad, yeffegh-d wammud wis sin "Taåezzult-iw" isefra s teqbaylit d tsuqqilt gher tefransist di 2006. Isental id-yewwi mgaraden d wid n zik ad naf: tajmilt i ubabat( atas it-yettun, cennun kan ghef tyemmat). Tayri macci d tin wawal: Hsen yefka-as ass deg-i tayri ad tedjudjeg  d ass n "Sidi Valentin" Tameghra n imaacuqen di 14 di Furar am urubiyen d imarikaniyen! Yesenteq-d ula d tissegnit tehka-d ghef wid i-nekren lxir-is almi i d tedjan aaryan.

  Di 2007 yeffegh-d wammud wis tlata Tiderray( isefra steqbaylit d tsuqqilt s tefransist). Seg usefru amezwaru "mebla dtiaad" arma d wis 33 " a yul-iw yesnehtiten", Hsen ad agh-d-yessik i temsal n tudert n yal ass maca s yefyar d unughen. Ula deg wammud agi yesenteq-d lmus ihkad-ghef is-yedhran d wemdan nni it id yesnulfan d tilufa nnidhen imi igh-d-yerna ula d timsaaraqt "27,5" deg yella yizen laali i "ZIVKA" tinna ghef i ittaru. Achal yecbeh yisem-agi. widen iwumi yaadjeb semmant dgha iyessen sen.

 Tiderray d Voluble nights d inilban imi kra kan n wussan i gar assen. Ammud agi anegarru d tasuqqilt n "IDH YUKIN" gher teglizit i texdem Dalila Ait Salem taselmadt n teglizit. Ma d tazwart yuratt-id u selmad di tesdawit n l'Oregon state di marikan Nabil Boudraa.

 Di 2008, yessekles Hsen yiwen CD n isefra ines id yeddan di Taazzult-iw s lmuziga anda yesseqdec 06 n wallalen akken ad asen-yernu di rruh w ad d-asen hninit di tmezzught n wid ara sen yeslen wad ten-yawi deg yiwet n tirza mebla "le visa" mebla ttesrih gher wayen yebgha ad sen-d-imel.

  Hsen ad yessufegh tasuqilt- n "TAAZZULT-IW" gher teglizit s yisem CONFIDENCE AND MEMORIES deg tasuqqilt d tazwert ttwaxedmen sghur Dalila Ait Salem d Nabil Boudraa. Deg-s id yedda usefru nni SIDI VALENTIN  i yettwasuqlen ass-a gher 10 tutlayin.  Maca Hsen Maric ghas akken yewwedh yettwassen, yegguma ad yettu tamazight nni: amud agi isefra TIBERNINT D SSELLUM d wis rebaa i yura, yura-t kan s tmazight, tisuqilin zemrent ad radjunt!

Ghret-tt, amar ahat ad tafem acu icudden ger tbernint d ssellum! Ad tafem i d tawaghit n weqbayli, acu n takti i icudden ger yitij d wadhu maca macci akken i tt-yettwali la Fontaine ghas akken tefka inzi gher-s. Akken daghen yenna Hsen kra n tmacahut: "Yesaa waadaw takanna" d taqsidht nni n tnudht.

44 d asefru deg-wen a ttardjun, yal asefru d taqsidt ghef d ihekku, yura-ten-id Hsen Maric amar ad tafem iman nwen daxel, wad tafem tifrat i kra n isteqsiyen is.

Ihi, uqbel ad nfak awal ilaq ad izer imeghri acugher Hsen Maric yegguma ad yehbes asizreg n tezmamin, yerna s-yedrimen-is i yettxellis yalci. Asmi yesaa azal n rebaa iseggasen yemmut jeddi-s Ali n said n tala tulmut i illan d amedyaz mucaan di lwaqt-is. ur yufi kra yenna wemghar teddem-it tatut imi d tamedyazt timawit ; wid itt-yessnen mmuten negh ttun-tt. Si lehzen nni ghef ugerruj iruhen, s ddemar nni imi di tallit nni ulac win ixemmemen ad ten yessekles, yerna yumen belli " sekra n wemghar yemmuten d tamkardhit i yewwi yid-s, yeggul ar kra ara yaru ara ad yeffegh "maci ad zeraagh ad iteddem wadhu" id yenna : tatut jami ad tughal ad tehwes kra si tsekla taqbaylit.

  Zdat usalu agi id-yerza Hsen, si tama nnegh ala asebghes i ara ad as-nessiwedh acku wid ibennun  ala qedha iyasen-neqqar.

Ddu d webrid, a Hsen, acku hala abrid i yessufughen!

                                        Dr  Said chemakh  Tagrest 2009